دیسی گھی صدیوں سے برصغیر کے گھروں میں استعمال ہونے والی ایک خالص اور قدرتی غذا ہے۔ پرانے زمانے میں تقریباً ہر گھر میں گھی گھر پر ہی تیار کیا جاتا تھا کیونکہ اسے نہ صرف کھانوں کے ذائقے کو بہتر بنانے کے لیے استعمال کیا جاتا ہے بلکہ اسے صحت کے لیے بھی مفید سمجھا جاتا ہے۔ خالص دیسی گھی کی خوشبو اور ذائقہ بازار میں ملنے والے گھی یا تیل سے بالکل مختلف ہوتا ہے اسی وجہ سے گھریلو طریقے سے بنایا گیا گھی زیادہ پسند کیا جاتا ہے کیونکہ اس میں خالص پن، صفائی اور قدرتی خوشبو برقرار رہتی ہے۔
گھر میں دیسی گھی بنانے کا ایک روایتی اور درست طریقہ یہ ہے کہ دودھ سے اتری ہوئی ملائی کو روزانہ ایک صاف برتن میں جمع کیا جائے جب مناسب مقدار میں ملائی جمع ہو جائے تو اسے ہلکا سا گرم کر لیا جاتا ہے تاکہ اس میں آسانی سے جاگ یعنی دہی لگایا جا سکے اس کے بعد اس ملائی میں تھوڑی سی دہی شامل کر کے برتن کو ڈھانپ دیا جاتا ہے تاکہ دہی اچھی طرح جم جائے۔
جب ملائی کا دہی تیار ہو جائے تو اسے رات بھر فریج میں رکھ دیا جاتا ہے۔ اس سے دہی اچھی طرح ٹھنڈا ہو جاتا ہے اور مکھن نکالنا آسان ہو جاتا ہے۔ اگلی صبح اس دہی کو مکھن متھنے کے برتن میں ڈال کر اچھی طرح بلایا یا متھا جاتا ہے اس عمل کے نتیجے میں نرم اور خالص مکھن الگ ہو کر اوپر آ جاتا ہے۔
اس مکھن کو الگ برتن میں نکال کر چولہے پر ہلکی آنچ پر گرم کیا جاتا ہے آہستہ آہستہ مکھن پگھل کر صاف اور خوشبودار گھی میں تبدیل ہو جاتا ہے جب گھی مکمل طور پر تیار ہو جائے اور اس کا رنگ ہلکا سا سنہری یا سبزی مائل ہو جائے تو اسے ٹھنڈا ہونے کے لیے رکھ دیا جاتا ہے بعد میں اسے چھان کر صاف اور خشک ڈبے میں محفوظ کر لیا جاتا ہے ۔خالص دیسی گھی بنانے کے لیے ضروری ہے کہ اسے صبر، صفائی اور درست طریقے سے تیار کیا جائے کیونکہ جلدی میں ملائی جلا کر بنایا گیا گھی نہ صرف ذائقے میں اچھا نہیں ہوتا بلکہ اس میں اصل خوشبو بھی باقی نہیں رہتی گھریلو طریقے سے تیار کیا گیا دیسی گھی اپنی خوشبو، ذائقے اور خالص پن کی وجہ سے کھانے کے لطف کو کئی گنا بڑھا دیتا ہے۔
(Dr۔Alia Khan)
تبصرے
ایک تبصرہ شائع کریں